Mavijosjet ndodhin kur gjaku bllokohet nën lëkurë, zakonisht për shkak të ndonjë shkaku që ka dëmtuar një enë të vogël gjaku. Disa njerëz zbulojnë se mavijohen shumë lehtë dhe nuk e mbajnë mend shkakun rrënjësor. Të tjerë zhvillojnë mavijosje të mëdha pas lëndimeve të vogla ose vërejnë se mavijosjet e tyre kërkojnë javë për t’u larguar. Mavijosje e lehtë nuk do të thotë domosdoshmërisht se kemi një problem shëndetësor, por ndryshimi i menjëhershëm i numrit të tyre kërkon një vizitë te mjeku.
7 arsye të mundshme pse mavijohemi lehtë
Ne priremi të mavijohemi më lehtë ndërsa plakemi, sepse enët tona të gjakut bëhen më të dobëta dhe lëkura jonë hollohet. Fenomeni mund të shfaqet edhe në familje.
Mjekimi
Ilaçet që hollojnë gjakun mund të shkaktojnë mavijosje të lehtë. Substanca të tilla mund të jenë warfarina, heparina, rivaroxaban, dabigatran, madje edhe aspirina. Ka edhe disa substanca të tjera që mund të ndryshojnë sjelljen e enëve të gjakut, si disa barishte si xhensen, xhenxhefil, hudhra, por edhe disa antidepresivë si Celexa dhe Prozac.
Konsumimi i tepërt i alkoolit dhe sëmundjet e mëlçisë
Cirroza e mëlçisë mund të jetë përgjegjëse për probleme të tilla. Ndërsa sëmundja përparon, mëlçia mund të ndalojë së prodhuari proteinat që ndihmojnë në mpiksjen e gjakut. Për këtë arsye, mund të shfaqen gjakderdhje të rënda dhe mavijosje.
Çrregullimi i gjakderdhjes
Sëmundja Von Willebrand shfaqet në rreth 1% të popullsisë. Një nga simptomat e saj është mungesa e një proteine të rëndësishme për koagulimin e gjakut. Hemofilia gjithashtu krijon një problem të ngjashëm.Kur një çrregullim i tillë i gjakderdhjes shkakton mavijosje, është gjithashtu e mundur që personi të ketë gjakderdhje të tepërt, madje edhe në një pikë kërcënuese për jetën. Simptomat mund të shfaqen papritmas.
Mungesa e vitaminave
Mungesa e vitaminës C mund të shkaktojë një gjendje të quajtur skorbut. Skorbuti shkakton gjakderdhje të mishrave të dhëmbëve, plagë që nuk shërohen dhe mavijosje të lehtë. Vitamina K ndihmon gjakun të mpikset për të ndaluar çdo gjakderdhje. Mungesa e vitaminave korrigjohet lehtë. Megjithatë, është e rëndësishme që mjeku të bëjë diagnozën përkatëse përmes analizave.
Vaskuliti
Është një inflamacion i murit të enëve të gjakut. Përveç rritjes së gjakderdhjes dhe shumë mavijosjeve, simptoma të tjera janë gulçimi, mpirja dhe shenjat e purpurta në lëkurë. Lloji i trajtimit varet nga ashpërsia e gjendjes.
Purpura senile
Shfaqet në moshën e tretë. Shkakton shenja vjollce që duken si mavijosje dhe zakonisht shfaqen në duar. Mbrojtja e lëkurës nga dielli mund të zvogëlojë intensitetin e simptomave.
Kanceri
Rrallëherë, një rritje e papritur e gjakderdhjes dhe mavijosjes është një shenjë e kancerit. Kanceri i gjakut dhe i palcës së eshtrave, si leucemia, mund të shkaktojë mavijosje. Personi mund të vërejë gjithashtu gjakderdhje të mishrave të dhëmbëve. Sidoqoftë, në cilindo nga rastet e mësipërme, duhet të vizitoni një mjek në mënyrë që të jeni të sigurt për shkakun dhe të jeni në gjendje të përballeni me rrënjën e problemit.
