Sa më shumë kohë të kaloni duke menduar, aq më pak kohë mbetet për veprim
Mendimi i tepërt: A po mendoni shumë?!?
Nëse mendoni për gjithçka që mund të kishit bërë ndryshe, nëse prireni të vini në dyshim vendimet tuaja dhe imagjinoni skenarin më të keq të mundshëm kur ndodh diçka e papritur, atëherë me siguri jeni duke menduar shumë, i njohur edhe si ‘mendim i tepërt’. Ndoshta ky zakon jo i shëndetshëm rezulton nga besimi se zgjidhja më e mirë “vjen” pas mendimeve të shumta dhe të detajuara.
Në fakt, sa më shumë kohë të kaloni duke menduar, aq më pak kohë keni për veprim. Natyrisht, të gjithë ndonjëherë mendojnë shumë, pasi rrethana të caktuara shkaktojnë ankth ose shqetësim intensiv dhe për rrjedhojë mendim të tepruar. Për t’i dhënë fund këtij zakoni, do të ishte mirë të kuptoni se kur po e bëni.
*Nuk fokusohesh te zgjidhja
Zakoni i të menduarit të tepërt është i ndryshëm nga procesi i zgjidhjes së problemeve. Mendimi i tepërt dhe analiza përqendrohen te problemi ndërsa zgjidhja e problemeve përfshin kërkimin e zgjidhjeve të mundshme. Zgjidhja e problemeve mund të çojë në veprime produktive, të cilat do t’ju përgatisin më mirë për t’u marrë me efektivisht problemet që mund të lindin. Mendimet e tepërta, nga ana tjetër, ushqejnë ndjenja të pakëndshme pa ju lejuar të dalloni zgjidhjet e mundshme.
*Mendimet që tentojnë të përsëriten
Kur mendoni shumë, mund të riprodhoni një bisedë ose ngjarje nga e kaluara në mendjen tuaj, ose të imagjinoni diçka të keqe ose te mire që po ndodh. Ky fiksim toksik i problemeve, gabimeve dhe dobësive tuaja rrisin rrezikun e problemeve të shëndetit mendor, sipas një studimi të botuar në JAP (Journal of Abnormal Psychology). Ndërsa shëndeti juaj mendor bie, ju keni më shumë gjasa të mendoni shumë ose të mendoni negativisht, duke krijuar një rreth vicioz që është vështirë të thyhet.
*Shqetësimi ju “vjedh” gjumin
Kur mendoni shumë, mund të ndiheni sikur nuk mund ta ndaloni trurin tuaj të mendojë vazhdimisht. Edhe kur jeni duke u përpjekur të flini, mund të keni probleme me kontrollin e mendimeve tuaja, ndërsa riprodhoni pafundësisht skenarë në mendjen tuaj që shterrojnë optimizmin e fundit. Komuniteti shkencor konfirmon atë që ne tashmë dyshonim: të menduarit e tepruar e bën gjumin sfidues, ndërkohë që ul cilësinë e gjumit. Vështirësia për të fjetur, nga ana tjetër, mund të “çojë” në mendime më shqetësuese.
*Vështirësi në marrjen e vendimeve
Është e rëndësishme që përpara se të merrni një vendim, të merrni parasysh opsionet tuaja dhe të shihni të gjithë situatën. Megjithatë, kjo nuk do të thotë që ju duhet të mbi-analizoni çdo rezultat të mundshëm dhe çdo zgjidhje të mundshme, pasi analizimi i tepërt dhe fiksimi bëhet me të vërtetë një pengesë. Në fakt, të dhënat shkencore tregojnë se të menduarit e tepruar e bën të vështirë marrjen e vendimeve. Nëse vini re se keni vështirësi të vendosni, madje edhe për çështjet e përditshme si çfarë të hani, mund të jeni duke menduar shumë. Ka shumë mundësi që po humbisni shumë kohë duke kërkuar “mendime të dyta, te treta..”, kur në fund, këto zgjedhje të vogla mund të mos kenë shumë rëndësi.
